ДЭЛХИЙН ХАМГИЙН ӨНДӨР ГҮҮР МИЁО ВИАДУК

Миёо Виадук нь Францын өмнөд хэсэгт Тарн голын хөндийг дамнан байрлах, дэлхийн хамгийн өндөр гүүр юм. Инженер Мишель Вирложо, архитектор Норман Фостер нарын зохион бүтээсэн уг татлагат гүүрний хамгийн өндөр багана нь 343 метр, нийт урт нь 2460 метр аж. Салхи, цаг уурын нөлөөг тооцсон аэродинамик хийцтэй тус гүүр 2004 онд ашиглалтад орсноор Парис-Газар дундын тэнгис-Испанийн чиглэлийн замын түгжрэлийг бууруулж, бүс нутгийн тээвэр, аялал жуулчлалд чухал хувь нэмэр оруулсан байна.