"БҮРЖ ХАЛИФА" ЦАМХГИЙН БҮТЭЭН БАЙГУУЛАЛТ, ИНЖЕНЕРИЙН ШИЙДЭЛ

Элсэн цөлийн дундаас сүндэрлэсэн “Бурж Халифа” цамхаг нь хүний оюун ухаан, орчин үеийн технологийн хүчээр байгалийн хүнд нөхцөлийг хэрхэн даван туулдагийн жишээ болдог. 2004 онд шавыг нь тавьж, зургаан жилийн хугацаанд босгосон уг байгууламж нь 828 метр өндөртэйгөөр дэлхийн дээд амжилтыг эзэмшдэг. Барилгын ажлын явцад тулгарсан хамгийн том сорилт бол Дубайн төөнөм халуун уур амьсгал болон асар хүчтэй салхины ачаалал байж. Инженерүүд салхины урсгалыг сарниулахын тулд барилгыг дээрээс нь харахад гурван дэлбээт цэцэг мэт "Y" хэлбэрийн бүтэцтэйгээр зохион бүтээж, өндөр авах тусам хэмжээ нь нарийсах шаталсан хэлбэрийг сонгосон нь барилгыг ганхалгүй тогтвортой байлгах гол шийдэл болжээ.

Нийт 500 мянган тонн жинтэй биетийг барихын тулд 50 метрийн гүнд 192 ширхэг хүчитгэсэн бетон гадас бүхий суурийг тавьжээ. Бетон цутгалтын ажил нь тухайн үедээ дэлхийн дээд амжилтыг тогтоосон бөгөөд 600 гаруй метрийн өндөрт тусгай насосоор бетон шахаж, чанарыг нь алдагдуулахгүй тулд ихэвчлэн шөнийн цагаар мөстэй хольж цутгадаг байсан аж. Мөн барилгын гадна талыг бүрхсэн 26 мянга гаруй тусгай шилэн хавтан нь нарны хэт ягаан туяаг ойлгож, доторх температурыг тогтмол барихаас гадна элсэн шуурганы асар их даралтыг даах чадвартай гэнэ. 

Оргил үедээ өдөр бүр 12 мянган хүн тасралтгүй ажилласны үр дүнд “Бурж Халифа” 2010 онд үүдээ нээж, Дубай хотыг газрын тосноос хамааралгүй аялал жуулчлалын дэлхийн төв цэг болгон хувиргасан байна. Өнөөдөр барилгыг тойрсон "Downtown Dubai" дүүрэг нь дэлхийн хамгийн үнэ цэнтэй бүс нутаг болон хөгжиж, Арабын Нэгдсэн Эмират Улсын ирээдүйн алсын харааны тод илэрхийлэл болжээ.