“KARLSRUHE MODEL” ХЭРЭГЖСЭНЭЭР ИРГЭД АВТОМАШИН БУС НИЙТИЙН ТЭЭВРИЙГ СОНГОХ НЬ ИХЭСЧЭЭ

Германы Карлсруэ хотын хэрэгжүүлсэн “Karlsruhe Model” буюу трам-төмөр замын хосолсон систем нь хотын түгжрэлийг бууруулж, автомашины хэрэглээг багасгасан дэлхийн хамгийн амжилттай нийтийн тээврийн шийдлүүдийн нэг гэж тооцогддог.

Энэхүү загварын онцлог нь нэг тээврийн хэрэгсэл хотын төвд трамвай хэлбэрээр, харин хотын гадна төмөр замын шугамаар галт тэрэг шиг зорчих боломжтой байдагт оршино. Ингэснээр зорчигчид хотын зах болон ойролцоох суурин газруудаас хотын төв хүртэл тээврийн хэрэгслээ солихгүйгээр шууд хүрэх боломж бүрджээ.

Карлсруэ хот 1980-аад оны үед өсөн нэмэгдэж буй автомашины хөдөлгөөн, замын түгжрэл, зогсоолын хүрэлцээгүй байдал зэрэг асуудалтай тулгарч байв. Харин 1992 онд трам-төмөр замын анхны шугамыг ашиглалтад оруулснаар нөхцөл байдал мэдэгдэхүйц өөрчлөгдсөн байна.

Шинэ системийн ачаар хотын захын иргэд автомашинаар бус нийтийн тээврээр зорчих нь эрс нэмэгдэж, хотын төвийн замын ачаалал буурчээ. Мөн өмнө нь ашиглалт багатай байсан төмөр замын сүлжээг үр ашигтай ашиглах боломж бүрдсэн байна.

Өнөөдөр Карлсруэгийн трам-төмөр замын сүлжээ хэдэн зуун километр урттай болж өргөжин хөгжсөн бөгөөд өдөр бүр олон мянган зорчигчид үйлчилж байна. Энэхүү туршлагыг Герман, Франц, Их Британи зэрэг орны олон хот судалж, өөрийн нөхцөлд тохируулан хэрэгжүүлжээ.

Хот төлөвлөлт, тогтвортой тээврийн хөгжлийн чиглэлээр ажилладаг мэргэжилтнүүдийн үзэж буйгаар Karlsruhe Model нь шинэ дэд бүтцийг бүхэлд нь шинээр байгуулахгүйгээр одоо байгаа төмөр замын сүлжээг нийтийн тээврийн системтэй уялдуулан ашиглаж болохыг харуулсан амжилттай жишээ болсон байна.