БНХАУ ДЭЛХИЙН ХАМГИЙН ДЭВШИЛТЭТ УХААЛАГ АВТО ЗАМЫН НЭГИЙГ АШИГЛАЛТАД ОРУУЛЛАА

Сувдан голын бэлчир дэх Шэньжэнь–Жуншань холбоос нь нийт 70 орчим километр урт бөгөөд далайн гүүр, хиймэл арал, далайн доорх туннелийг нэгтгэсэн, ойролцоогоор 4.8 тэрбум ам.долларын өртөгтэй инженерийн томоохон бүтээн байгуулалт юм.

Энэхүү төслийн хамгийн онцлох хэсэг нь "ирээдүйд тэсвэртэй" буюу ухаалаг эгнээ юм. Энэ нь өнөөдрийн автомашинд бус, ирэх хэдэн арван жилийн дараах бүрэн автономит тээврийн хэрэгсэлд зориулан төлөвлөгдсөнөөрөө онцлог. Зам дагуу суурилуулсан 5G болон V2X холбооны системүүд нь автомашинуудтай бодит цагийн горимоор мэдээлэл солилцож, жолоочгүй автомашинууд аюулгүй, үр ашигтай зорчих нөхцөлийг бүрдүүлдэг байна.

Мөн далайн доорх 6.7 километр урт туннельд ухаалаг эргүүлийн роботууд 24 цагийн турш ажиллаж, агаарын чанар, утаа, замын эвдрэл гэмтлийг тасралтгүй хянаж, аливаа эрсдэлийг шуурхай мэдээлдэг ажээ. Харин гүүрийн бүтээц нь хүчтэй тайфун, далайн усны зэврэлт зэрэг хүнд нөхцөлийг тэсвэрлэхээр хийгдсэн бөгөөд 100-200 жилийн ашиглалтын хугацаатайгаар төлөвлөгджээ.

Шинэ холбоос ашиглалтад орсноор Шэньжэнь болон Жуншань хотын хоорондын зорчих хугацаа хоёр цагаас ердөө 30 минут болж буурч, Их Булангийн бүсийн логистик, үйлдвэрлэл, өндөр технологийн салбарын хөгжлийг эрчимжүүлэхээс гадна ирээдүйн жолоочгүй тээврийн системийг дэмжих стратегийн дэд бүтэц болж байна.